Siunissarput ataatsimoorullutigu
GUX Nuummi makku naleqartitat aallaavigalugit sulivugut:
Ilikkagaqarneq – Ilinniarnertuunngorniarfimmi ilikkagaqarneq qitiutinneqarpoq, ulluinnarmi suliaqarnitsinni aamma fagini tamani
Ataatsimoorneq – Inimi atuartitsivimmi aamma ilinniarnertuunngorniarfimmi ataatsimoorluta ilikkagaqartarpugut
Ataqqinninneq – Ullut tamaasa akisussaaffeqarnitsigut
takutittarparput aamma immitsinnut oqaloqatigiinnitsinni
uagullu pilluta eqqartueqatigiittarnermi
Pissuserissaarneq – Pisarpoq imminut aamma inuiaqatigiit avatangiisit pillugit ilisimasaqalernikkut aamma sutigut tamatigut peqataalluartarnikkut
Ineriartorneq – Ilinniarnertuunngorniarnerup nalaani ilinniakkatigut aamma inuit akornanniittarnikkut ineriartorneq pisarpoq
Atuartunut
Ilikkakkat – Ilisimasat aamma ilikkagaqarneq qitiutitaraavut
- Naleqquttumik ingerlanneqarnera: Ilikkagaqarneq pisarpoq erseqqilluinnartunik ilikkagassanik anguniagassaqarnikkut, qulakkeertarpavullu atuartut piginnaasaminnik anguniagaqarnermikkut ikiortarnerisigut. Tamanna anguniartarparput ilikkagaqarnissami aamma paasinninnissami teknologi nutaaliaasoq aamma qanga periutsit atorlugit.
- GUX Nuummi: Ilikkagaqarnissami aammattaaq ilinniartitsinermi Kalaallit Nunaata immikkut nunarsuarmi inissisimaneranut aamma kulturikkut tunngasunut attuumassuteqarneranut atasut ilinniartitsissutigisarpavut. Tassaasinnaapput Kalaallit Nunaat pillugu ilisimasat aamma kalaallinut inuiaqatigiinnut naleqquttut sunniutaasut pillugit.
Ataatsimoorneq – Ataatsimoorluta nammaqatigiippugut
- Naleqquttumik ingerlanneqarnera: Ingerlatat aalajangersimasut ingerlatilersarpavut ilikkagassat ataatsimut anguniagassat anguniarlugit atuartut aamma ilinniartitsisut suleqatigiittarlutik. Ataatsimoorneq pitsanngortarpoq atuartut eqimattakkuutaarlutik suleqatigiinnerisigut aamma inuttut ataatsimoornernik aaqqissuussinikkut, taamaaliornikkut atuartut ukiuni assigiinngitsuni aallartittut akuleriilersarput.
- GUX Nuummi: Naleqartippavut suleqatigiinneq aamma attaveqatigiittarnerit. Tamanna pisarpoq uagut inuiaqatigiinnut ilaanitta qitiutittarneratigut, tamatumalu pisarnissaa inuiaqatigiit aamma GUX Nuup akornanni ataqatigiinnerisigut.
Ataqqinninneq – Uagut assigiinngissusigut naleqartitaraavut aamma
inissaqartitaralugit
- Naleqquttumik ingerlanneqarnera: Pingaartipparput atuartut ilorrisimaarnerat, malittarisassaqarpugullu erseqqilluinnartunik immitsinnut qanoq oqaloqatigiittarnissarput pillugu aamma inimi atuarfiusumi atuarfimmilu immitsinnut qanoq pissusilersortarnerput pillugu. Aaqqiagiinngittoqalissagaluarpat oqaloqatigiinnikkut tamakku aaqqittarpavut.
- GUX Nuummi: Assigiinngissuseqarneq aamma ileqqut ataqqivavut. Ataqqinninnermi taamaallaat qanoq pissusilersortarneq pineqanngilaq, aammattaaq kalaallit kulturiata aamma allat kulturiisa nutaanerusortaat qangaanerusortaallu naleqartinneqartarnissaat aamma akuerineqartarnissaat pineqarput.
Pissuserissaarneq – Nunarsuaq immitsinnullu pilluta ilikkagaqarpugut
- Naleqquttumik ingerlanneqarnera: Pissuserinneq ilinniartitsinermi pilersarpoq uagut kalaallit kulturiannut aamma nunarsuarmioqataanermut qimerluuineq ilannguttarnerisigut. Inuusuttut ikiortarpavut peroriartornissaannut aamma ilinniarnertuunngorniarfimmi akisussaaffeqarnerulersinniarlugit.
- GUX Nuummi: Pissuserissaarnermi pineqarpoq qanga ileqqut aamma nutaaliornerup oqimaaqatigiissilernerisigut. Atuartut ilinniartitsinermi peqataalluartarnissaannut sakkussaqalersinniartarpavut, aammattaaq najukkami inuiaqatigiinni aamma nunarsuarmi avataanniittumi peqataalluarnerisigut.
Ineriartorneq – Ataatsimut silatunerulerpugut
- Naleqquttumik ingerlanneqarnera: Ingerlaavartumik suliatta qanoq sunniuteqarnera paasiniartarparput aamma kingumut qiviarluni nalilersuinikkut, atuartut aamma ilinniartitsisut faginik eqqartueqatigiinnerisigut ilaatigullu ilikkakkat aamma ataatsimooqatigiinnermi anguniagassat nalilersortarlugit. Ilikkakkatigut tamanna imatut pisarpoq fagini ataasiakkaani nalunassusiisa artornariartortinnerisigut. Inuit akornanniittarnermi aamma inuttut ineriartorneq pisarpoq ammasumik aamma suleqatigiinnikkut imminnut naapeqatigiittarnermi, aamma ilorrisimaarneq pillugu oqaloqatigiittarnermi, nal. akunnerini suleqatigiiffiusuni inoqatinillu ataatsimooqatigiillu aaqqissuussisarnerni.
- GUX Nuummi: Ineriartorneq pisarpoq ataatsimoortarnerni nal. akunnerini atuarfiusuni aamma taakku avataasigut. Suliaqariaatsit assigiinngiiaartut sapinngisatsinnik ingerlattarpavut, atuartunik ataasiakkaanik ineriartortitsilersinnaasunik, aammattaarli ataatsimoortarnerni.
Atorfilinnut
Ilikkagaqarneq – Ilisimasaqarneq aamma ilikkagaqarneq qitiutippavut (atorfilinnut tamanut)
- Naleqquttumik ingerlanneqarnera: Ilikkagaqarneq ilinniarnertuunngorniarfimmi uagutsinnut atorfilinnut tamatsinnut atuuppoq. Ilinniarnertuunngorniarfimmi ilinniartitsisutut ilikkakkatigut soorlu assersuutigalugu ilikkagassatut anguniakkat suuneri erseqqissumik paasitinneqassapput aamma ilikkagassatigut siuariartorneq. Ilikkakkat aamma tassaasinnaapput allaffissornermi suliassatigut naammassiuminarsaaneq, aamma kollegiami sulisutut atuartunik siunnersuisutut ilikkakkat tassaasinnaallutik atuartunik tapersersuinerup pitsaanerulersinnera. Ilikkakkatigut aammattaaq pineqarpoq atorfillit suliassanik qitiutitsinerat namminnerlu suliaminni qanoq pitsaanerusumik aaqqiiffigisinnaaneraat.
- GUX Nuummi: Ilisimasat aamma misilittakkat akunnitsinnut sapinngisamik ingerlateqqittarpavut, taamaalillutalu immitsinnut ikiortarluta atuartumut, suleqatinut aamma ilinniarnertuunngorniarfimmut pitsaanerpaamik iluaqutaasinnaassammata.
Ataatsimoorneq – Ataatsimoorluta nammaqatigiippugut (atorfilinnut tamanut)
- Naleqquttumik ingerlanneqarnera: Ataatsimoorneq aammattaaq atorfilinnut pingaartuuvoq. Tamanna pisarpoq immitsinnut ikioqatigiittarnikkut suliassat annikinnerit aamma annertunerit pillugit. Sumi inissisimanerput pinnagu ataatsimoorluta suliassat naammassiniartarpavut.
- GUX Nuummi: Fagit imaluunniit suleqatigiilluni ingerlatassat suliassat aallartinniartarpavut, suleqatigiikkuutaat assigiinngitsut unamminartut aaqqinnissaannut suleqatigiittarluta, soorlu ataatsimoortitsilluni aaqqissuussinissat aaqqissortarlugit aamma soorlu assersuutigalugu atuartut ilorrisimaarnerulernissaat aamma atuariartortarnissaasa siuarsarneratigut.
Ataqqinninneq – Uagut assigiinngissusigut naleqartitaraavut aamma
inissaqartitaralugit (atorfilinnut tamanut)
- Naleqquttumik ingerlanneqarnera: Immitsinnut ataqqilluta oqaloqatigiittarpugut pissusilersortarlutalu. Assigiinngitsuuvugut, tamannalu pissutigerpiarlugu uagut tamatta suliffeqarfimmut immikkorluinnaq pissanganartumillu tunniussaqartarpugut.
- GUX Nuummi: Immitsinnut akuersaarpugut. Sulisut aamma atuartut akornanni iluatsitsilaarnerit aamma iluatsitsinerit annertuut ulluinnarni aamma ataatsimut ataatsimiittarnitsinni erseqqissaatigisarpavut.
Pissuserissaarneq – Nunarsuaq immitsinnullu pilluta ilikkagaqarpugut
(atorfilinnut tamanut)
- Naleqquttumik ingerlanneqarnera: Qitiutipparput pitsaasumik inoqataanissarput suliarpullu allanut annertusumut ilaanera takusinnaallutigu, tassami uagut inuiaqatigiinnut avatangiisitsinnut ilaagatta. Pissuserissaarneq aammattaaq tassaavoq uagut allat pisariaqartitaat eqqarsaatigisaratsigu, atuartut aamma suleqatit pisariaqartitaat. Taamatut suleriaatsitsinni aamma tunngavilersuutitsinni assigiississuseqarnerup pilersittarneranut paasinninneq pilersittarparput.
- GUX Nuummi: Kulturi aallaavigalugu ilinniartitsisarpugut aamma oqaatsit marluiit tamatumunnga ilutigalugu uagut atuartut ilikkakkatigut aallaaviat mianerisarlutigu. Tamatumalu saniatigut aammattaaq kulturikkut aaqqissuussinerit assigiinngitsut atuarfimmi ingerlanneqartarput, soorlu assersuutigalugu upernarnerani tusarnaartitsineq aamma filmfestivaleqartitsineq, kikkut tamarmik peqataaffigisinnaasaanni.
Ineriartorneq – Ataatsimoorluta silatunerulerpugut (atorfilinnut tamanut)
- Naleqquttumik ingerlanneqarnera: Inuiaqatigiinni aamma teknologiimi ineriartornermut malinnaaniarsariuartarpugut. Ineriartortuarpugut inuttut ataasiakkaatut aamma ataatsimoorluta. Nutaanik atortoqalerpat imaluunniit suleriaaseqalerpat immitsinnut ikioqatigiittarpugut tamakku paasiniarlugit angusassallu eqquutsinniarlugit.
- GUX Nuummi: Ilaatigut pædagogiskiusunik ulloqartitsisarpugut ilikkagassat assigiinngitsut qitiutillugit, aamma pikkorissarnerit allat sulisooqatigiinnut assigiinngitsunut tulluartut ingerlattarlugit, taakkunani ilikkagassat aallallu piginnaasat sammineqartarlutik.