Ilinniarnertuunngorniarneq sunaava?
Ilinniarnertuunngorniarluni illinniartitaaneq, naalisarlugu GUX, tassaavoq inuusuttunut ilinniartitaaneq atuagarsorfiusoq Aasianni, Sisimiuni, Nuummi aamma Qaqortumi neqeroorutigineqartoq. Ilinniarnertuunngorniarluni ilinniarneq ukiunik pingasunik sivisussuseqarpoq (taamaattorli timersornermut tunngasumik sammivik ukiunik sisamanik sivisussuseqarpoq) Kalaallit Nunaatalu iluani aamma avataani ingerlaqqiffiusumik ilinniartitaanernut periarfissiilluni.
Sooq ilinniarnertuunngorniarneq?
GUX-imi ilinniakkat sammivii assigiinngitsut illit soqutigisannut ilinniagaqaqqinniarninnullu naleqqussakkat neqeroorutigineqarput. Pissanganartumik ilinniagaqarneq siunissamut aqqutissaavoq:
- Atorfinnut amerlanerusunut periarfissaqalissaatit. Atorfinni amerliartuinnartuni ilinniagaqarsimanissaq piumasaqaataaleriartorpoq.
- Akissarsiaqarnerulernissamut periarfissaqassaatit.
- Ilinniakkani annertuumik ineriartussaatit, kisiannili aamma inuttut atugarisatigut annertuumik ineriartussallutit.
Ilinniarnertuunngorniarfimmut qaqugukkut qinnuteqartoqassava?
Majoriaq aqqutigalugu imaluunniit onlinekkut www.sullissivik.gl aqqutigalugu qinnuteqarnissamut killigititaq tassaavoq 1. marts. Online atorlugu qinnuteqarniaruit eqqaamassavat MitID-qarnissat.
Tunngaviusumik ilinniarneq
Tunngaviusumik ilinniarneq ukiup affaanik sivisussuseqarpoq. Tunngaviusumik ilinniarneq ilinniarfinni sisamani tamani assigiippoq. Tunngaviusumik ilinniarninni ilinniartitsissutit kalaallisoorneq, qallunaatoorneq, tuluttoorneq, matematik, kulturimik ilinniarneq, science, ilinniariaatsinik ilinniarneq timersornerlu sammissavatit. Tunngaviusumik ilinniarnerup kingorna ilinniakkap sammivianik aaliangersimasumik ilinniarneq aallartissavat.
Aaliangersimasumik sammiveqarluni ilinniarneq
Ilinniakkap sammiviani ilinniarneq ukiut pingajuata affaanik sivisussuseqarpoq. Ilinniakkat sammivii toqqarneqarsinnaasut arfineq-pingasuupput. Ilinniarnertuunngorniarfimmut qinnuteqarninni ilinniakkap sammivianik pituttuisuunngitsumik toqqaariissaatit. Tunngaviusumik ilinniarnerup kingorna pituttuisumik aalajangissaatit.
Ilinniartitsissutit qaffasissusaat
Ilinniartitsissutit assigiinngitsunik qaffasissuseqarput A, B C-nullu agguagaallutik. A qaffasinnerpaavoq C appasinnerpaajulluni. Ilinniartitsissutit qaffasissusaat ilinniakkat sammiviinik nassuiaatini ersipput.
Ilinniakkap sammivianik toqqaaneq
Ilinniarlutit aallartinnginninni ilinniakkap sammivianik toqqaassaatit. Toqqakkat ilinniarnertuunngorniarfimmut qinnuteqaatinnut allassavat. Piginnaasatit soqutigisatillu naapertorlugit ilinniakkap sammivia toqqarsinnaavat. Kommunerisanni ilinniakkat sammivii toqqarneqarsinnaasut tunngavigalugit toqqaassaatit. Aatsaat ilinniakkap sammivia kommunerisanni neqeroorutigineqanngippat kommunerisavit avataaniittumik ilinniarnertuunngorniarfimmik toqqaasinnaavutit.
Ilinniakkap aaliangersimasumik sammiveqarnera qanoq paasisariaqarpa?
Ilinniagaq aaliangersimasumik sammivilik tassaavoq ilinniartitsissutinik aaliangersimareersunik imalimmik ilinniagaqarneq. Assersuutigalugu ilinniakkap sammivia toqqarsinnaasat tassaasinnaavoq, ilinniartitsissutinik isumassarsiorfiusinnaasunik arlaqartunik, soorlu nipilersornermik assilialiornermillu imalik. Ilinniakkat sammivii pissanganartut tamaasa pillugit quppernerni tullerni atuarit.
