GUX Nuuk, Qeqqani Ilinniarnertuunngorniarfik, Kalaallit Nunaanni ilinniarnertuunngorniarfiit annersaraat. Nuummi ilinniarnertuunngorniarfiup saniatigut kujataani peqarpoq; Qaqortumi, aamma ilinniarnertuunngorniarfiit marluk avannaani; Sisimiuni aamma Aasianni. Nuummi ilinniarnertuunngorniarfik 1989-imiilli atuutilerpoq namminersortutut atuarfittut. Atuarfik 1977-imi aallarnerpoq taamanikkut HF-imut ilinniarfiulluni Ilinniarfissuarmut ilinniartitsisunngorniarluni ilinniarfimmut atasuulluni. 1986-imi HF ilinniarnertuunngorniarfinngortinneqarpoq, taamanikkulli ilinniarnertuunngorniarfiulluni.
Ilinniarnertuunngorniarfik 500-t missaannik atuartoqarpoq ukiunut sisamanut agguataartunik; 1. – 3. g, kiisalu 4. g-klassi ataaseq (timersornermut tunngasoq). Timersornermut tunngasup ukiuni sisamani ilinniarfiusup saniatigut klassit ilinniakkanut sammivinnut tulliuttunut arfinilinnut agguataaqqapput: Nutaaliorneq (N), Nalinginnaasoq (O aamma P), Pinngortitalerineq (Q), Oqaasilerineq (R), Peqqinneq (S) aamma Inuiaqatigiilerineq (T) – ilinniakkat sammivii assigiinngitsut pillugit sukumiinerusumik atuarsinnaavatit uani.
70-it pallillugit atorfiliuvugut, tassaasut aqutsisut, ilinniartitsisut, allaffimmi sulisut, pedellit, igaffimmi sulisut, kiisalu kollegiami aappalaartumi isumaginninnermik suliaqartartut. Uani atuarfiup sulisuisa allattorsimaffiat takusinnaavat.
Illuutip pingaarnerup sanianiippoq Kollegia Aappalaartoq, tassani atuartut 95-it kiisalu isumaginninnermik suliaqartut allaffeqarput. Kollegiap taassuma saniatigut ilinniarnertuunngorniarfik illoqarfimmi sumiiffinni assigiinngitsuni kollegianik inissiaqarpoq.