Oqaatsit piorsarsimassuserlu
Oqaasilerinermik inunnullu tunngasunik sammiveqarluni ilinniarneq

Ilinniakkap sammivia taanna attaveqatigiinnermik, inunnik, piorsarsimassutsinik inuiaqatigiilerinermillu soqutigisaqartumut naleqquppoq Oqaatsinik ilinniarneq nuannaraat aammalu kulturit allat ilisimasaqarfiginerulernissaat soqutigalugu. Oqaatsinitigut piginnaasavit sungiusarnissaannut ineriartortinnissaannullu periarfissaqassaatit aammalu tuluit spanskillu kulturiat, ulluinnarni inuunerat, atuakkiortarnerat, nipilersortarnerat inuiaqatigiinnilu pissusaat ilisimasaqarfigilissallugit. Sammivimmi tassani ilinniarniaraanni attaveqatigiinnissamut atuarnissamullu kajumissuseqarnissaq piumasaqaataavoq.

Ilinniakkap sammiviani tassani tuluttoornermi spanskisoornermilu nunarsuarmi oqaatsit pingaarutillit marluk ilinniassavatit. Taamattuttaaq ilinniartitsissutit piorsarsimassusermik sammisaqarneq, oqaluttuarisaanerlu samminerisigut sakkussaqarlualissaatit nunarsuarmi nutaaliaasumi piorsarsimassutsit assigiinngitsut naapinnerini akuunissannut.

Ilinniakkap sammivia taanna nunatsinni nunanilu allani ilinniakkanut ingerlaqqiffiussunut inunnut tunngasunik ilisimatusarnernut t inuiaqatigiilerinermullu sammisunut isissutaasinnaavoq.

 

Ilinniarnerup ingerlaneranut sammisanullu assersuutit:

  • Europa – afrikap avannaanit nunasisunit nuannisarfik atugarliorfilluunniit.
  • Tuluit isikkamik arsarnikkut piorsarsimassusaat
  • Atuakkialerinermi, filmini aammalu eqqumiitsuliornermi amerikkamiut takorluugaat.
  • London – kulturit naapiffiat aporaaffiallu.
  • Ullutsinni oqaluttuarisaanermilu oqaatsit, atuakkiat ilisarnaatillu atugaanerannik misissuineq.
  • Magisk realisme amerikami kujallermi atuakkialerineq.