Uuma nittartakkap nutserneqarnissaa utaqqivarput
Timersornermik sammiveqarluni ilinniarneq
Sammivik taanna qaffasissumi unammisartuulluni timersortartuusumut ilinniarnertuunngorniarfimmilu ilinniakkamik naammassisaqarusuttumut piukkunnarpoq. Ilinniarnertuunngorniarneq ukiumik ataatsimik sivisunerusunngorlugu ingerlatissavat, taamaasilluni atuarfimmi sapaatip akunneranut tiimikinnerusassaatit timersuutinnillu sungiusarnissannut Kalaallit Nunaatalu iluani avataanullu unammiartortarnissannut piffissaqarnerussallutit. Ilinniarneq Kalaallit Nunaanni Timersortartut Kattuffiat Elite Sport Greenlandilu suleqatigalugit aaqqissuunneqassaaq. Timersornermik sammivilimmut ilinniakkamut qinnuteqarniaraanni isernissamissamut piumasaqaatit GUX-imi isernissamut piumasaqaatit nalinginnaasut assigai,tamatumalu saniatigut Kalaallit Nunaanni Timersortartut Kattuffiannit Elite Sport Greenlandimilluunniit akuersissummik peqassaatit. Taamaattumik ilinniakkap sammivianut timersornermut qinnuteqarniaruit, qinnuteqaatigisavit nalinginnaasup saniatigut timersoqatigiiffinni sungiusaasumiit imlt. Timersoqatigiiffinniit oqaaseqaammik ilanngussissaatit. Ilinniagaq timersornermik sammivilik, imarisamigut Nuummi ilinniarnertuunngorniarfimmi ilinniakkat sammiviini assigiinngitsuni tassa pinngortitalerinermi sammivilimmik ilinniakkami, peqqinnissamut tunngasunik sammivilimmik ilinniakkami kiisalu inunnut tunngasunik ilisimatusarnermut (humanistisk) sammivilimmut ilinniakkami, sammineqartartunik imaqarpoq, timersornermullu tunngasunik annertuumik sammiveqartinneqarluni. Timersornermik sammiveqarluni ilinniakkap sammiviit allat assigalugit Kalaallit Nunaanni Danmarkimilu ilinniakkanut ingerlaqqiffiusunut isissutaasinnaavoq.
Ilinniarnerup ingerlaneranut sammisanullu assersuutit:
- Timersorneq timillu sananeqaataa.
- Timersornermut tunngatillugu tarnip pissusaanik sammisaqarneq.
- Aaqqiinissamik siunertaqarluni projektilerineq.
- Olympia pillugu eqqarsartaaseq qangarsuarlu Grækenlandimi Atletikkip sunniutaa.
- Timersorneq, piorsarsimassuseq inuiaqatigiillu.
